Joh 4 | WSK | STEP | Pharisee kari bibiya kariimet den imi balukasan se ikikasan, “John kariimet suen biya me nunga anuso,” makasan. “Jesus kariimet suen biya nunga anuso.”

John 4

Jesus Samaria imet ilak munakaram

1 Pharisee kari bibiya kariimet den imi balukasan se ikikasan, “John kariimet suen biya me nunga anuso,” makasan. “Jesus kariimet suen biya nunga anuso.” 2 (Bare Jesus kota kariimet me nunga anukaso, noko olekem ura mu bitakasan.) 3 Se Jesus ikiam mu Pharisee den mu ikiman mam, ale Judea sor beteram ale peleram Galilee namakaso.

4 Se lage nu tam te namakaso mu nama Samaria ningi namaram ale nama Galilee aratam. 5 Se nu aolak iluwam nama Samaria ko wonong gotek bo Sychar mu te nama aratam. Wonong gotek mu Jacob ko namar Joseph ali te tuam wore ko duap te. 6 Jacob ko yu mutim nungam ale utu nowakaso mu sor nukung te anikaso. Se Jesus aolak iluwam nama laga te aratam. Worem tai dirmam, se aolak moram se yu mutim duap te / norogen te daigam.

7 Se noko olekem wonong biya na inang diamonko namaman. Se nu dagiwaram se Samaria imet bo yu utuokko tairam, se Jesus nu maonam, “Yu sang utu aisu se naikko,” mam.

9 Se imet mu balam, “Ni Juda kari, se ani Samaria imet! Ni awuk se ani yu ko aga manem?” (Juda alo mu Samaria alo arungu me biguwusan, se mu ko nu uwuta balam.) ^{▼▼John 4:9 Bala bo mu iwita: “Juda kariimet Samaria nunga bagunang na yu te me nasan, se mu ko nu buta balam.”}

10 Se Jesus noko den koma balam, “Ni Kaem ko munan kariimet nungarso mu se, kari yu ko nika manaruwoso mu ago ko ikisam ale, mu asele ni nu manorsam se yu marak sokel ago mu kisiso ale.” ^{▼▼John 4:10,14 Yu marak sokel ago: John 6:35; 7:37-39; Rev 21:6.}

11 Se imet mu nu maonam, “Kari biya, yu mutim mu du biya. Se ni mel bo yu te utu ani aisuko mu mena. Buta se ni yu marak sokel ago mu aparete utu aisu se naikko? 12 Yu mutim imi anananga taleng girigir Jacob nungam, ale ko kuriang ko bulmakau sipsip ago nowa nu kueram ale bita nangaram. Bare ni Jacob kiara iwita munakasam agila pa?”

13 Bare Jesus imet mu maonam, “Kariimet yu imi nasan mu udagi nuna aking yu ko kuemonkowo. 14 Bare awiriya yu ani tuek mu nauk, mu nu udagi aking yu ko me kuerukko. Yu ani tusam mu yu duap ago iwita, se pempem la gomang ningi barasu se marak sokel tom suen biya te bagurukko mu tui se lagurukko.”

15 Se imet mu balam, “Kari biya,” mam, “yu balem wore aisuko! Se udagi la ani yu ko me kuerik, ale yu mutim ningi yu utuekko me tai se lagirikko.”

16 Se Jesus nu maonam, “Ni namar ka kari aru ilak tairko.”

17 Se imet mu balam, “Ani agari mena pa!”

Se Jesus balam, “Ni balsam ni kari mena mu diram ni balsam. 18 Bore ni kari nunga gi bita bita nama tom 5 aram. Se aitak mu 6 ilak bagasam sumu nika kari nunguning mena. Se ni diram balsam.”

19 Se imet mu balam, “Kari biya, aitakta ani ikiem ni prophet. 20 Ana Samaria nanga taleng alo duruk imitang te bolala awukasan ale Kaem nup patawukasan. Bare nina Juda balsan kuwim Kaem nup te patowara ko mu Jerusalem diram aniso masan.”

21 Se Jesus nu maonam, “Imet, nunguningta ani ka manorsam, udagi munan taiwoso mu tai aratuk se kariimet Kaem ko nup patawomonko mu duruk imitang te se Jerusalem ningi me bolala awumon ale Kaem nup patawomonko. 22 Nina Samaria alo awiriya nup patowasan mu nina me ko ikisan. Bare ana Juda alo ana Kari nup patowasan mu ana ko ikisan. Mu awuk, Kaem ko munan suen biya kariimet te nunga giokko mu ana Juda alo nanga ningi aratuwoso se. 23 Tom tai aratam pingi aram se kariimet Korang Bur te, se nongomang ningi nunguning te, Kaem nup patawomon ale kuring karo tumonko. Kaem kariimet uwutata nup patawomonko mu nu ko kueso. 24 Kaem nu Bur. Se kariimet nup patawomonko mu Korang Bur te, se nongomang ningi nunguning te nup patawomonko.”

25 Se imet mu nu maonam, “Ani ikisam Messiah tairukko mu ani ko ikisam. Tom nu tairuk mu nu mel suen biya ko dugu duap nanga manukko.” (Messiah mu nu Kristus.)

26 Se Jesus balam, “Kari ni ko balsam mu anigita ^{▼▼John 4:26 Jesus “anigita” maso mu Greek den te “ego eimi” aniso (English den te “I am”), se ko nunguning mu “ani bagasam”. Kaem kota numi nup uwutata Moses maonam: Exodus 3:14.}, e ta kerak munakawasam.”

Olekem alo Jesus kote peleman taiman

27 Nu iwita imet mu ilak munakawaram se ko olekem peleman tai aringiman ale biririkiman. Mu awuk, nu Juda kari, bare imet bo ilak munakawakaso. Bare bo ta nu me isarman, “Ni anape ko ilak munakawasam a?” ma me balman. Aking “Ni anape mel nukote toko?” ma me balman tala.

28 Se imet mu ko yu kuting beteram ale peleram wonong te namaram ale kariimet nunga maonam, 29 “Tairal ale kari ewere arigalko. Ani mel suen biya girakala beterem tai aitak wore aga manaru saparam. Agi mu Kristus agila pa!” 30 Se nuna wonong beteman ale Jesus aringimonko namakasan.

31 Se olekem Jesus manorman, “Kari Biya,” maman, “ni na noko.”

32 Bare nu balam, “Aninga na ago wore nina me ko ikisan.”

33 Se olekem nongota nunumi isarukasan, “Kariimet i na maingkala giam ago tai tuam agila pa?” makasan.

34 Bare Jesus nunga maonam, “Kari aga beteram se tairem mu kuring karo tuek ale ura balam mu menawu kutuwurik umutang mu aninga inang,” mam. 35 “Nina iwita balsan, ‘Na asurman se sige nama 4 mu te na inang yopuruk se ginakko,’ masan. Bare ani ninga manorsam, arigalko, na inang yoparam ale gia ko terong mam. ^{▼▼John 4:34-35 Jesus Nuet kuring karo tuokko tairam: John 6:38; 17:4. Na inang yoparam: Luke 10:2.} 36 Kari na inang gi bolala awuso mu nu maingkala ura duap beteram ale koma yawara to se inang tom suen biya yawarakala anirukko mu gi bolala awuso. Buta se kari na inang asurso, se kari na inang gi bolala awuso, mu nuna ilak la wete amilmilomonko. 37 Se den imi kariimet balu lagasan mu nunguningta, ‘Kari bo na inang asurso, se kari bo taiso nunguning gi bolala awuso.’ 38 Ani nina ningam te me ura taman mu te namaral na inang gi bolala awuralko ninga manem. Kariimet sikina ura kowar beteman ningam asurman se nunguning aratam wore gialko.”

Samaria kariimet Jesus ko nongomang ningi nunguning aram

39 Samaria kariimet suen biya imet den balam mu ikiman ale Jesus ko nongomang ningi nunguning aram. Imet iwita nunga maonam, “Nu ani mel suen biya beterem wore aga manaru saparam,” mam. 40 Se nuna Jesus kote tai arataman mu nuna nu nongorak bagurukko isarman. Se Jesus tom ilagala ko arungak bagakaso. 41 Se Samaria kariimet suen biya tala Jesus ko den ikiman ale ko nongomang ningi nunguning aram. 42 Ale imet mu manorman, “Aitak ana ko nangamang ningi nunguning aram. Bare ni den balem mu ko la mena. Ana nangata noko kuring te diram den ikiman, ale ko ikisan, imi nunguningta kari ana kariimet ali ewere te nanga sangukko wore tairam.”

Jesus kari supuling bo ko kuriang nungam

43 Jesus tom ilagala Samaria bagaram, ale aking barasam Galilee namaram. 44 Nu kota balukaso, “Prophet nongota nunga wonong duap te mu nunup mena pa,” makaso.

45 Tom Jesus Galilee nama aratam mu kariimet nu amilmil tuman. Mu awuk, nuna ulengkala Passover ko tom te Jerusalem ago namaman, ale kilek suen biya Jesus bitakaso mu aringiman.

46 Jesus aking Galilee ningi wonong gotek Cana mu te peleram namaram, wonong nu te yu nungam se waen ko geragam wore te namaram. Se kari supuling bo bagakaso, nu ali sor bitaruwara ko kari bo, mu nu ko namar karogo, se namar mu Capernaum wonong te kuera ago bagaram. 47 Se nuet mu Jesus Judea beteram ale Galilee ningi tairam wore ko den ikiam ale kote namaram ale wosenga den maonam, “Ni Capernaum namar ale aga kuriang kuerukko pingi aram umu nunguru se maragurukko,” mam.

48 Se Jesus nu maonam, “Nina bo ta kilek bibiya me arigal, mu nengemang ningi me ta nunguning arukko!” ^{▼▼John 4:48 Juda alo kilek bibiya aringimonko kuakasan: John 2:18; 1 Cor 1:22.}

49 Se kari mu balam, “Kari biya, aninga kuriang kuerukko pingi aram. Se tairatela namanakko.”

50 Bare Jesus nu maonam, “Ni piler namarko. Ka kuriang me kuerukko.”

Se kari mu Jesus ko den ko gomang ningi nunguning aram se peleram ko sor te namakaso. 51 Nu namawaram se lage te ko ura kari tai aringiman ale manorman, “Nika kuriang marak bagoso,” maman.

52 Se nu nunga isuam, “Aninga kuriang amaru kumik kowar bita tam?” Se nuna balman, “Ekalako kowar motam one o'clock iwitata kumik kowar bita tam,” maman. 53 Se nuet ikiam, “Jesus ekalako one o'clock te diram aninga maonam 'ka kuriang me kuerukko,' mam.” Se nu ko nuwus kuriang ago suen la Jesus ko nongomang ningi nunguning aram.

54 Kilek kasa nunguning Jesus Galilee ningi beteram mu bo giram beteram mu nu yu nungam se waen ko geragam. Asele Judea ningi Jerusalem namaram, aking peleram Galilee ningi nu kilek imi akingtala beteram.